டியர் அமெரிக்கன் பிரெசிடெண்ட்..

உதயசங்கர்

டோண்ட் ஒர்ரி..ஐ வில் மானேஜ்..

அவர்கள் முதலில் கத்துவார்கள்

கொஞ்சம் காதுகளைத் தொலைத்துவிட வேண்டும்

அவர்கள் முதலில் திட்டுவார்கள்

கொஞ்சம் மாறாப்புன்னகை பூக்கவேண்டும்

அவர்கள் முதலில் கேள்விகள் கேட்பார்கள்

கொஞ்சம் பிஸ்கட் போடவேண்டும்

அவர்கள் முதலில் முரண்டு பிடிப்பார்கள்

கொஞ்சம் ஆசை காட்ட வேண்டும்

அவர்கள் முதலில் போராடுவார்கள்

கொஞ்சம் தண்டிக்க வேண்டும்

அவர்கள் முதலில் கேட்க மறுப்பார்கள்

கொஞ்சம் கைக்கூலிகளை அனுப்ப வேண்டும்

அவர்கள் பசி பசி என்று கூப்பாடு போடுவார்கள்

கொஞ்சம் இனம், சாதி, வெறியைத் தூண்ட வேண்டும்

அவர்கள் இல்லை இல்லை என்று சொல்லுவார்கள்

கொஞ்சம் கொஞ்சமாகவே கொடுக்க வேண்டும்

அவர்கள் அந்நிய ஆதிக்கம் என்று சொல்லுவார்கள்

கொஞ்சம் தேசப்பற்று பெர்ஃபூயூம் அடிக்க வேண்டும்

அவர்கள் கம்யூனிஸ்டுகளோடு சேருவார்கள்

கம்யூனிஸம் காலாவதியாகி விட்டதென பிரச்சாரம் செய்ய வேண்டும்

அவர்கள் அணு உலை வேண்டாமென போரிடுவார்கள்

திறந்த வெளிச்சிறையில் அவர்களை அடைக்க வேண்டும்

அவர்கள் வால்மார்ட் வேண்டாம் என்பார்கள்

கொஞ்சம் நாடு முன்னேறுகிறது என்று பொய் சொல்லவேண்டும்

அப்புறம் அவர்கள் பழகிவிடுவார்கள் எல்லாவற்றுக்கும்

தாங்களாகவே முன்வந்து சிரித்துக் கொண்டே

அடிமைச்சங்கிலியில் பிணைத்துக்கொள்ள

தாங்களாகவே முன்வந்து பலிபீடத்தில் தலை கொடுக்க

என்ன கொஞ்சம்

என்னைப் போல சிரிக்காமல் கழுத்தறுக்க வேண்டும்.

இப்படிக்கு உங்கள் இந்திய விசுவாசி

அல்லது

இந்தியாவை விலை பேசும் வியாபாரி.