விடுதலை

நிறங்களின் பேதத்தைக்

குலைத்து விட்டாள் என் சின்னஞ்சிறுமகள்

சூரியனைக் கருப்பாய் வரைந்தாள்

மலைகளை வெள்ளையாய்

கடலை பழுப்பாய்

அலைகளைச் சிவப்பாய்

அவள் கண்கள் கண்ட வண்ணங்களெல்லாம்

விடுதலைப் பாடல்களிசைத்தன

எல்லா வண்ணங்களையும்

குழப்பியொரு ஒரு கத்திக் கப்பல்

வரைந்து முடித்தாள்

பெருமிதத்தின் சிகரம் ஏறி

கப்பலிலிருந்து ‘டாட்டா’ காட்டினாள்

காற்று வீசியது

கண்மூடித் திறப்பதற்குள்

கப்பல் மறைந்தது

மீண்டும் ஒழுங்குசெய்யப் பட்ட

வண்ணங்கள் அழுது கரைந்தன

அவளை வரச் சொல்லி.