நானும் பூச்சியும்

உதயசங்கர்

நான் கவிதை எழுதிக் கொண்டிருக்கிறேன்

என் கவிதையை ஒரு பூச்சி வாசித்துக் கொண்டிருந்தது

எச்சரித்தும் அது விடாமல் என் கவிதையை

பிரித்து மேய்ந்து கொண்டிருந்தது

கைகளால் தட்டி விட்டும்

வாயினால் ஊதித்தள்ளியும்

விரட்டி விட யத்தனித்தேன்

என் கவிதையில் என்ன கண்டதோ தெரியவில்லை

மீண்டும் மீண்டும் வந்து எழுத்துகளின் மீது விழுந்தது

என் கவிதை பிடிக்காமல்

திடீரென அது என்னை வந்து கடித்து விட்டால்

உடனே கைகளால் தட்டி

காலினால் மிதித்து நசுக்கி விட்டேன்

நான் நசுக்கும்போது அதுவும்

கால்களினால் என்னை நசுக்கி விட்டது

இப்போது சாகாவரம் பெற்றது என் கவிதை.