பறம்பு மலைப் பயணத்துக்குத் தயாரா?

 

பறம்பு மலைப் பயணத்துக்குத் தயாரா?

பறம்பின் பாரி” இளையோர் நாவல் –  நூல் அறிமுகம்

வி. லெட்சுமி

முதுகலைத் தமிழாசிரியர்
அரசு மேல்நிலைப் பள்ளி
செட்டிகுளம்.

கி.பி. இரண்டாம் நூற்றாண்டில் வாழ்ந்த கடையேழு வள்ளல்களில் முதன்மையான பாரி பரம்பு மலையை ஆட்சி செய்த வேளிர் குலத் தலைவன். பாரி வீரத்தின் தலைசின்னமாக, ஈகையின் சிகரமாக இருந்தான். கொழுகொம்பின்றித் தவித்த முல்லைக்கு தன் தேரைக் கொடுத்தான். தானம் கேட்பவர்களுக்கு இல்லை என்று கூறாது எதையும் கொடுக்கும் வளளல் தன்மை கொண்டவன் பாரி. அதையே சதிச் செயலாக்கி சேர ,சோழ, பாண்டியர்கள் சேர்ந்து பாரியை வஞ்சித்துக் கொன்றார்கள்.

 பாரியின் உயிர் நண்பரான கபிலர் பாரியின் பெண் மக்களான அங்குவை, சங்கவை இருவரையும் திருமணம் முடித்துக் கொடுக்க அலைந்து திரிந்தார். சேர ,சோழ, பாண்டியருக்கு அஞ்சி யாரும் மணம் முடிக்க முன்வரவில்லை. கடைசியில் கடை ஏழு வள்ளல்களில் மற்றொருவர் ஆன காரி தன் மகன்களுக்கு அவர்களை மணம்முடிக்க சம்மதித்தார். ஆனால் அவருடைய இரண்டு மகன்களில் ஒருவரான திரு கண்ணன் மட்டுமே சம்மதிக்க, மற்றொரு மகனான தெய்வீகன் சம்மதிக்கவில்லை. மனம் வெதும்பி பாரியின் மக்களை அவ்வையார் வசம் ஒப்படைத்து விட்டு தீ பாய்ந்து உயிர் நீத்தார்.

ஔவையார் மற்றொரு மகனையும் சம்மதிக்க வைத்து மூவேந்தர்களையும் அழைத்து அந்த திருமணத்தை நடத்தி வைத்தார் என்பது நாம் அறிந்த பாரியின் கதை.

இப்புத்தகத்தில் பாரியின் அறநெறிகளை அவனது காலத்தின் சுவடுகளைக் கொண்டு புனைவாக தருகிறது இந்நாவல். பாரியின் பதின் பருவம் எப்படி இருந்திருக்கும், அவன் வேள்பாரியாக உருமாறுவதற்கு முன்னால் அவனுடைய குணாதிசயங்கள் எப்படி வளர்ந்திருக்கும், அவன் எப்படி தமிழின், கொடையின், அறத்தின், நட்பின், வீரத்தின் அடையாளமாக திகழ்ந்தான் என்பதை பற்றிப் பேசுகிறது

இந்த நாவல். சங்க பாடல்களை அடிப்படையாகக் கொண்டும், குறிஞ்சிப்பாட்டு, மலைபடுகடாம், வீரயுக நாயகன் வேள்பாரி, நிலம் பூத்து மலர்ந்த நாள், சிந்து சமவெளி பண்பாட்டில் திராவிட அடித்தளம் ஆகிய நூல்களின் உத்வேகத்திலும்  இந்நூல் எழுதப்பட்டிருக்கிறது.

கால சக்கரத்திற்குள் நுழையும் கேப்டன் பாலு பாரியின் நண்பன் திரையனாகவும் பாலுவின் காதலி மதுமிதா ஆதிரையின் தோழியான கோதையாகவும் கதையில் வலம் வருகின்றனர்.

பாரின் பறம்பு மலையில் பழுத்த வேரில் பழுத்த பலா பழத்தைப் பிரித்து போட்டியிட்டு உண்டல், காட்டு விலங்குகளை வேட்டையாடுதல், மரங்களை வெட்ட வரும் மனிதர்களை மறைந்திருந்து வளரி வீசி வென்று மலையின் ஒரு பகுதியில் தினை விளைவிக்க செய்யும் பண்பாளனாக பாரி, பாரி பறம்பு மலை முழுவதையும் அறிந்தவனாக இக்கதையில் வருகின்றான். தன் தாத்தாவிடம் கொண்ட உறவும், தன் தந்தை பனையனோடு பாரி தான் சிறு குழந்தையாக இருக்கும் பொழுதே தந்தையின் முதுகில் அமர்ந்து பனைமரம் ஏற பயணிப்பதும், கொற்றவை குறிகூறுதலும் ,காட்டின் வளங்களான வள்ளி கொடியிலிருந்து நீரை பருகுதல், காட்டு திராட்சைப் பழங்களைத் தின்பது, மரத்திலிருந்து விழும் நெல்லிக்கனிகளை உணவாக உண்டல், மலைவாழ் மக்களின் இசை கருவிகள், வாழும் பறவைகள், மலரும் பூக்கள்,இசைக்கருவிகள் முதலியவற்றை இந்நூல்வழி அறிய முடிகிறது.

செங்காந்தள் படர்ந்த காடு தீப்பற்றி எரிவது போலவும், வெண்காந்தள் மலர்ந்த காடு பனிமூட்டம் சூழ்ந்தது போலவும் காணப்படுவது. காட்டின் 99 வகை மலர்கள் இப்படி காட்டின் பல்வேறு நிகழ்வுகள் நம்மையும் பறம்பில் அழைத்து செல்கிறது. சாத்தன் மலையில் உடும்புகளைக் கட்டி மலைப்பொந்தில் இருக்கும் தேனை எடுத்து வருதல், களரி வீசுதல் போன்ற ஒரு முறைகள் நம்மை ஒரு பாரியின் போர் திறனோடு நம்மையும் ஒரு போர்க்களத்தில் இன்று போர் செய்யும் வீர நிலையில் இருந்து பாரி வெற்றி கொள்ள வேண்டும் என்ற எண்ணத்தை நம்மிடையே தூண்டுகிறது.

கதையின் ஒரு பகுதியில் பாரியின் பதின்பருவம் குறித்தான அனுபவமென்றால் மறுபாதி சிந்து சமவெளி புலம்பெயர்ந்த வாழ்வின் எச்சங்களைக் கூறுகிறது.

இடை இடையே கேப்டன் பாலுவின் நிகழ்கால வாழ்க்கையோடு திரையன் வாழ்க்கையும் மாறி மாறி வருவது சற்று கதையின் வேகத்தைக் குறைப்பதாக அமைந்துள்ளது. பாலுவின் காதலியாக வரும் மதுமிதாவின் சமயோசித புத்தி அருமை. கோதையாக அவள் திரையனைக் காப்பாற்றுவது போன்றவை கதையில் சுவாரசியம் மிகுந்ததாக உள்ளது.

சோழனை ஒற்றை ஆளாக நின்று கவணால் களமாடும் சாத்தனின் வீரம், திரையனைக் காப்பாற்றும் பாரியின் களரி வீசும் வீரமும், பாண்டியர்களை ஆநிரை கவர்தல், மீட்டல் ஆகிய வெட்சி, கரந்தை போர், ஆநிரை பிடிக்க வந்த பாண்டியரை அங்கிருந்து துரத்தும் பாரியின் போர் வெற்றியுடன் நாவல் நிறைவு பெறுகின்றது.

பாரியின் பறம்பு மலையோடு பாலு என்ற திரையன் மட்டும் அல்ல;  வாசிக்கும் நம்மையும் அங்கேயே இருந்துவிடச் சொல்கிறது. அது தான் நூலின் வெற்றி.

நம்முடைய பதின்பருவக்குழந்தைகள் வாசிக்க வேண்டிய நூல்.

வெளியீடு - வானம் பதிப்பகம்/97515 49992

நன்றி - புக் டே